Ghjornu di a ceremonia: celebrata u quindecesimu ghjornu dopu a Pasqua, tutti i trè anni.  Un indultu pontificale (privilegiu accurdatu da a lettera di u papa) di u 1mu ferraghju di u 1820 hà accettatu di celebrà ogni annu, a seconda Dumenica di Pasqua, a festa sulenne di a Vergina, à l’altare chì li hè dedicatu cù una messa, uffiziu è panegiricu.

Nuvena preparatoria, celebrazione è prucessione :

A pittura hè cacciata un ghjornu prima à a celebrazione è piazzata nant’à un reliquariu chì li hè riservatu. 

U lindumane, a celebrazione si face dopu à nove ghjorni di prighere, seguitata d’una prucessione ind’è u paese cù a pittura di a Vergina Maria, traspurtata nant’à un reliquariu (XIXs), sta pittura hè l’ughjettu di stu pelegrinaghju triennale dipoi u 1734, annu di u Miraculu (Paisolu di Romanacce).

A cumare di a ceremonia : una raprisentante di Maria è Michèle.

A tradizione vole chì u prete sceglie una cumare per a ceremonia tutti i trè anni, per ch’ella trasmette u ringraziamentu, a ricunniscenza  per a Vergina Maria chì s’era manifestata à u paisolu di Romanacce ind’è a famiglia di Maria è Michèle in u 1734. U prete rivela a so scelta à a persona designata dopu à a ceremonia è li dumanda di tene st’infurmazione sicreta sinu à a prussima celebrazione. I paruchjani scopranu l’identità di a cumare u ghjornu di a ceremonia quandu st’ultima si mette ind’è u futtogliu chì li hè reservatu.

U sunettu dedicatu à a cumare

Sunetti, ode è stanze sò dedicati à a cumare di a ceremonia, stampati è distribuiti u ghjornu di a triennale.