Guadu in là : U quartieru si hè custruitu da fiume in là. Si sente dì  à spessu Gualundà o Valindà è si trova in l’atti civili di u decienovesimu una famiglia Valinda chì esceria da issu quartieru. U retabile di a chjesa Sant’Andria, chì ricolla à u sedecesimu, hè attribuitu à Michele da Valinda (di u Valindà, Guadu-in-là)

CARRUGHJU PIER SIMONE GISNESTRA 

Natu in Oletta ver di u 1670, hè statu prima à favore di i genuvesi. Membru di l’Accademia dei Vagabondi, publicheghja sottu à u nome d’Orazio Buttafocu, u resucontu di l’evenimenti (Raguagli) accaduti in Corsica trà u 1729 è u 1731, Officiale superiore à u serviziu di Napoli, essendu in Corsica verdi u 1730, piglia a pratesa di i scuntenti è participeghja à a rivolta di u 1730 in quant’è tinente di i generali Ceccaldi è Giafferri. In u 1732, in tantu ch’ellu era esiliatu in Roma, fù accusatu di crimine d’inghjulia à maistà, e so case d’Oletta funu brusgiate è arruinate e so pruprietà. Da Livornu à li durò à cumplettà contru à Genuva cù Dumenicu Rivarola è i generali Giafferi, Ceccaldi è Gentile. Vultarà in Corsica solu in u 1747, è s’occuperà di u so patrimoniu sinu à a so morte in u 1759.

STRETTA CALA BRAGHE

(odinimu esistente) :

Cala Braghe significaria « calà i pantaloni ». Issu strittinu pocu cunnisciutu permettia à l’abitanti di u locu di fà i so bisogni fora di vista di i cumpaisani.