Ind’è i Santamaria d’Oletta, si pò riculà sin’à Bastiano Santamaria è u figliolu, Padov’Antonio d’Oletta (mortu prima à u 1695). In u diciottesimu è u dicienovesimu sò stati uni belli pochi l’omi di chjesa di issa famiglia. Frà di elli, Luigi Santamaria hà avutu una certa nomina à l’entre di u XX^u seculu ; Natu di lugliu di u 1816, di Padov’Antonio Santamaria (1768-1844) è Catherine de Pruno, fù curatu di Luri.

SCALINATA DUMÈ LECCIA

(16 di nuvembre di u 1925 Oletta – 16 di ferraghju di u 2002, Nizza)

Persunalità forte di u paese in parechji duminii, Dumè Leccia hè statu impiegatu municipale, assicurendu solu solu, anni è anni, u serviziu di l’acqua a racolta di a rumenzula, l’intratenimentu di i carrughji. In oltre, Dumè Leccia, omu pietosu è devotu à a chjesa hè statu tutta a so vita orgnaistu è sacrestanu di a chjesa d’oletta. A perdita di Dumè, tenutu cara da tutti, ci hà lasciatu un gran viotu.

CARRUGHJU ANTOINE NEGRI

(11 di maghju di u 1925 Oletta – 1945 Hanoï, Vietnam)

Partutu in Oriente Stremu à l’età di 20 anni. Incurpuratu à u 6^simu regimentu d’infanteria culuniale, hè subitu rimarcatu è nominatu capurale sceffu. U 20 di dicembre durante l’operazione di nettera d’Hanoï, si porta vulintare per l’attaccu d’un impurtente nidu di resistenza, conduce i so omi senza teme nisun periculu, è casca culpitu à morte quand’ellu  tuccava, in testa di i so suldati l’oggettivu assignatu. Citatu à titulu postumu à l’ordine generale di u Corpu d’Armata, hè statu decoratu di a Croce di Guerra cù a stella vermiglia, cù in fine di citazione « Bellu esempiu di curagiu, cumbattente di prima trinca chì mustrò un bellu spiritu di sacrifiziu, particularmente ammiratu da tutti ».