Attu I

Dipoi u mese di ferraghju l’inquietitudine era di più in più impurtente per raportu à l’evoluzione di a pandemia di u COVID-19, l’affari si sò precipitati a vigilia di l’elezione municipale. L’urganisazione di l’elezioni hà necessitatu a messa in piazza d’un protocollu rigurosu: circulazione ind’è u scagnu di votu cuntrullata, gestione di u numeru di l’elettori ind’è i scagni, u staziunamentu ind’è i scagni di votu era interdettu, prudutti idroalcolicu à l’intrata è à a surtita. Malgradu a paura di l’epidemia, numarosi elettori sò venuti à vutà è anu rispettati e cunsigne sanitarie. Ùn ci hè statu casi di coronavirus in Oletta in lea cù l’elezioni.

U cunfinamentu

U 17 di Marzu di u 2020, u cunfinamentu hè statu decretatu da a sera à u lindumane. Oletta hè divintatu un veru paese viotu induve a paura di chjappà u siscu era prisenta in ogni persona. Più di caffè, più di resturanti, più di peluccheri, o altri cummerci fora di a butteca l’Olittese, u Leclerc, a Casa de Pan, U scagnu di tabaccu. Più nimu ind’è e strette fora di qualchi spassighjatori à a fine di u dopu meziornu muniti di a so attestazione di surtita d’una ora.  

Più di vittura, più di messe, più di manifestazione culturale durante tutta a durata di u cunfinamentu. A scola, a ciucciaghja è a bibliuteca eranu ancu chjosi. L’abitanti anu respettatu e cunsigne sanitarie.

Ma si pò vede aspetti pusitivi : a pulluzione hà diminuitu, ma ancu u rimore, permettendu di sente è di piglià u tempu d’ascultà u cantu di l’acellu ammirendu u svegliu di a natura.

U scunfinamentu hè statu decretatu l’11 di maghju di u 2020. 

A cumuna hè stata vicina di i so amministrati

Durante stu periodu, a merria hè stata aperta. L’agenti cumunali di i servizii amministrativi è tecnichi anu assicuratu e so attività, in merria, o in teletravagliu per quelli chì avianu a pussibilità.

L’eletti sò stati tutti prisenti.

Tutte e misure di prutezzione sanitarie sò state pigliate : Plexis ind’è tutti i scagni, distribuzione di prudutti idroalcolicu, maschere, desinfezzione di i lucali.

Accolta telefonica assicurata è accolta fisica cù appuntamentu.

Reunione supprimate : messa in piazza di cellula d’aiuta à a pupulazione.

A penuria di maschere

A cumuna avia una riserva di 5 000 maschere chì datava di a grippa H1N1 ma ancu una riserva di prudutti idrolicu. I medichenti di u settori n’hè mancava.

A merria hà pigliatu a decisione di dà 2 000 maschere à a Palmola, 1 000 à l’uspidale di Bastia è à tutti i medichenti di u paese. Avemu pussutu dà prudutti idrolichi è guanti. Allora ch’à u nivellu naziunale i risichi eranu à u listessu nivellu, a cumuna hà pussutu cumprà direttamente in China un lottu di 5 000 maschere cù l’aiutu d’un currispundente corsu stallatu in Shangaï.

3 000 altre maschere anu pussutu esse cumandati cù l’aiutu di l’assuciazione di e Merrie di Francia, è infine 5 000 maschere lavevule sò stati compri à un’intraprese situata in Corsica Suprana.

Ci vole à mintuà u travagliu di e cusgidore di a cumuna chì anu fattu più di 2 000 maschere.

Sta riserva impurtente realizata da a cumuna hà permessu di fà prufittà tutti l’impiegati è l’eletti. Hà permessu dinò di dà 3 maschere per ogni abitanti di a cumuna. A distribuzione s’hè fatta numinativamente è l’inveloppi sò stati diposti ind’è e scatule. Ciò chì hà raprisentatu più di 5 000 maschere durante un periodu induve era impussibile di truvà ne ind’è u cummerciu.

Bluse, sopra scarpi … desinati à u persunale di a ciucciaghja è di a cantina sò stati dati à a Palmola.

Aiutu à e persone

A cellula stallata per aiutà a pupulazione hà identificatu e persone isulate, malate, fragile di a cumuna. I so numari di telefonu accessibili ghjornu è notte sò stati cumunicati à a pupulazione da u nostru dispusitivu d’infurmazione è di cumunicazione « Infos mairie » per chì ognunu possa chjamà i servizii è parlà di i so prublemi è bisogni (corse, medicamenti…)

Stu dispusitivi destinatu à tutta a pupulazione era in cumplemente di a telealarme per e persone isulate è malate, offerta da a cumuna.

E sporte sulidarie

In cullaburazione cù a banca alimentaria di a Corsica, l’Uffiziu di sviluppu agriculu di a Corsica è di i pruduttori lucali, a cumuna hà distribuitu cinque volte, da aprile à ghjugnu, 80 sporte à e perone isulate, malate o fragile. 

Ste 400 sporte cumposte di frutti, legumi, casgi, carne è vinu sò state apprezziate da e persone cuncernate. 

L’azzione reglementaria di a cumuna

Per raportu à l’impurtenza di a pandemia, a cumuna hà fattu un arrestatu ublighendu di testà tutti i pensiunarii di a Palmola è di e strutture situate nant’à a cumuna accugliendu persone anziane, ma ancu i medichenti di ste strutture.

U prefettu di a Corsica Suprana hà dumandatu à a Merria di supprimà st’arristatu perchè ste pregurative ùn rilevava micca di i puteri di pulizza di u merre ma di u guvernamentu.

L’azzione economicu di a cumuna

A crisa economica causata da a pandemia hà toccu i cumercianti  è l’agricultori di a cumuna.

U cunsigliu municipale hà ancu decisu d’esunerà i risturanti  di a tassa d’uccupazione di u duminiu publicu è l’allevadori titulari d’un cuntrattu d’uccupazione di i terrenu cumunali, di a tassa di u statu annuale ma ancu i pruduttori participanti à u mercatu di u cumbentu.

Ind’è u quadru di u prughjettu di a Casa Medicale d’Oletta, l’Agenza Regiunle di a Salute hà decisu in accordu cù i duttori, Alessandroni, Duplan è Graziani, l’apertura d’un centru COVID Oletta.

U centru situatu ind’è l’anziana ciucciaghja, sopra à u cabinettu medicale, messu à a dispusizione da a cumuna, hà permessu è permette sempre di riceve pazienti di l’inseme di u Nebbiu è di a Conca d’Oru per falli testi PCR o serologichi, è di mette in opera e prucedure di quarantana, o prucede à un’uspitalisazione.

I duttori praticanu i testi PCR allora chì Virginie Santoni, aghjunta di u merre è infirmiera DE praticava e prise di sangue per i testi serologichi.

Dopu u scunfinamentu, a vita hà ripigliatu guasi nurmalmente, cù ben intesu u rispettu di i gesti barrieri è l’interdizione d’urganizà i raggrupamenti. 

Tutti i prugrammi passati per a stagione stivale sò stati annulati.

Po hè rivinutu u tempu di u cunfinamentu, menu siveru cà u primu.

A cumuna, ancu s’ella hè stata tocca da a pandemia, hè stata pocu cuncernata.

Avemu avutu un mortu di u COVID nant’à a cumuna. André LECCIA, anzianu artigianu muratore è elettu cumunale, hè partutu u 12 di nuvembre di u 2020. Ci rigurderemu d’un omu suciabile, carcu d’energia, partutu troppu in furia per via di a malatia.

L’Attu I di a pandemia hà compiu fine di l’annu cù a messa, u focu di Natale è l’illuminazione di u paese.