A Casa Morlas hè di stile neoclassicu. St’edifiziu risponde à l’architettura di e case di i nobili corsi di u XIXsimu seculu. A casa impone a so statura ind’è u fundale di u paese. Cumposta d’una vechja casa di u XVIIsimu o di u XVIIIsimu seculu, sarà ingrandata più tardi.
U patrone di sta casa era Michele Morlas, natu in Oletta in u 1756, hè statu tenente à a legione corsa, capitanu à u quatriesimu battaglione di i caccaciadori. Si marita cù a surella di u Generale Francis di Rivarola, a cuntessa Maria Teresa. Ricunnisciuta cum’è famiglia nobile da u cunsigliu superiore in u 1772, i Morlas ci anu lasciatu cum’è ricordu, stu magnificu castellu è a so torra.
Accantu à a chjesa Sant’Andria, quartieru Santamaria, si pò vede una casa chì pare fà parte di a chjesa. Raprisenta un matrimoniu famosu, quellu di Charles Fredien de Vidau è di Maria Claude Santamaria, u 10 d'aprile di u 1829. Oghje si parla di a casa de Vidau. Quattru anni dopu, un antru matrimoniu ind’è a famiglia crea una lea in più cù Oletta, quellu di Frédien Louis Félix de Vidau, dettu Fredianino cù Etiennette de Rivarola (1809-1852) detta Fanny.
Piattata daretu à un arburone, è i so muri, sottu à Guado in là, sta furturezza ùn manca di storia. Ghjuvan Battistu Marinacce, figliolu di Paulu Mattei, nutariu è merre d’Oletta, è di Maria Augustina Cavallacce, fù u patrone di stu magnificu edifiziu. Ghjuvan Battistu hè statu consule di Francia à Tanger, Cadix, è Kharkov nanzu d’occupà u postu di ministru pieniputenzariu à Cuba induv’ellu morse in u 1921.
Stu castellu hà un stile partuculare è si puderebbe qualificà « d’architettura di villegiaturia » per via di e so fantesie è di u so caratteru. U so scopu era di fà novu, di fà fantasticu è di lascià fà l’inspirazione di l’architetti. Parechje case di nobili francesi è d’Italia anu adupratu issu stile nove di decoru è di fattura. In Corsica u ritruvemu dinò in Aiacciu o in Capi Corsu (Morsiglia è Castellu Fantauzzi).
U castellu di Cavallacce hè statu fattu nant’à quattru nivelli, cù e so cantine guasi interrate nant’à trè piani. L’internu di a casa v’accoglie cù u so ghjocu di scale maestose, è e so opere tinte. Fora, avemu cornice, tittelle rose, balcone è un belvedere.
Vicinu, ritruvemu a tomba famigliale, custruita in u 1887 da Pancrace Cavallacce.
U castellu Cavallacce hè statu vinduttu parechje volte, ma sempre intratenutu da i so pruprietarii.
U Palazzu Piazza Alessandrini hè un casamentu di stile neoclassicu chì prisenta numarose asimetrie. Sta particularità si spiega cù a storia. Infatti, u centru di u palazzu attuale hè fattu di duie anziane case. E facciate sò state addunite da l’architettu Adolphe Peretti, autore di l’uspidale di Toga in Bastia.
L’Alessandrini, uriginarii di Canari, anu una piazza impurtante ind’è a lotta contru à Genova, soprattuttu Charles-François Alessandrini, chì avia urganizatu a resistanza ind’è u Capi Corsu.
U so figliolu, Luc-Octave Alessandrini, hè à l’urigine di a nascita di a branca Piazza-Alessandrini cù u matrimoniu di a so figliola, Anne Félicité Alessandrini (nata in Oletta u 7 di Marzu di u 1842) cù François Marie Felix Piazza (natu in Poggiu d’Oletta u 16 d’uttobre di u 1844) chì fù u merre d’Oletta è chì intruduce l’industria di i cucculi ind’è un nordu di a Corsica.
L’appellazione « Casa di l’Ambasciatore » hè un effluviu di u passatu cadastrale di a casa situata « lieu-dit Cavallacce », chì vene da e funzione di u so anzianu pruprietariu ind’è u duminiu diplomaticu, Monsieur l’Ambasciatore René Massigli.
Cù a so moglia Odette, nata Boissier, si sò adattati à u locu per fà d’impurtenti travagli è per ottene stu resultatu architeturale chì cumpone sta bella casa di vacanze. A so bianchezza cuntrasta cù l’esotismu di e persiane turchine. Hà ricevutu assai invitati è trà elli persone famose cum’è Ormesson, Pompidou, Beaumont ecc.
Qualchi olittesi contanu sempre oghje cum’è a casa campava à l’usu inglese cù u Tea-time per riceve Monsieur l'Ambasciatore è u so amicu Lord Peter Thorneycroft, cancelliere di l'Echiquier in u 1957.