Pierre Antoine Boccheciampe, aversariu risoltu di Pascal Paoli, palisò à i Francesi chì occupavanu Oletta u cumplottu chì si facia contru à elli in u 1769. Sottumessa l’isula, fù numinatu pricuratore di u Rè à u sede po membru di u cunsigliu supranu di a Corsica.

CARRUGHJELLU JEAN ANDRÉ BASSI

(25/01/1925 – 10/09/1947 Peam Chor-Cambodgiu)

Capurale sceffu à u Regimentu Mistu di u Cambodgiu. Classa 1945 – matricule N°161 à u recrutamentu d’Aiacciu. Hè partutu sparitu in cor’d’una patruglia in piena Guerra d’Indoscina, u 10 di sittembre di u 1947 à Pean Chor, provincia di Kandal (Cambodgiu).

« Giovanu gradatu, curagiosu è arditu chì, in una forte imbuscata duve ella era ingagiata a so unità, u 10 si sittembre di u 1947, à Peam Chor, hà oppostu una difesa eroica à un aversariu assai più numarosu è hà cercu di cumbatte l’effettu di surpresa cù sanguefreddu for di cumunu. Summerchjatu da u numaru di l’assaltori, hè mortu dopu à una resistenza eroica. Lasciarà u ricordu d’un suldatu magnificu. »

Ritagliu di u decretu di u 23 di Dicembre di u 1958, publicatu à u J.O di u 3 ghjennaghju di u 1959 purtendu cuncessione di a Medaglia Militare. Isse cuncessione cumportanu l’attribuzione di a Croce di Guerra di u Teatru di l’Operazione Esterne cù a Palma.

CARRUGHJU L’ARCHIATRE NATALE SALICETI

(1714, Oletta – 1789,…)

Natu in u 1714 in Oletta, Natale Saliceti hè statu u prima d’una ceppa d’archiatri puntificali diventendu medicu persunale di u Papa Piu VI (1775-1799).

A so carriera hè propiu lanciata quand’ellu hè numinatu capimedicu di u spidale di Santo Spirito di Roma in u 1748 ; d’altronde, in a gallaria di i medichi famosi di issu spidale, ferma sempre oghje un bustu di issu nativu d’Oletta. In u 1758, a so numinazione in quant’è prufessore d’anatumia à l’unviersità di a Sapienza li permette d’assicurà torna a so pusizione in e sfere scentifiche è pulitiche di a vita rumana. Piglia una parte attiva in l’attualità scentifica è literaria di l’epica, essendu membru di parechje accademie, per indettu, l’Accademia di e Scenze è Lettare di Napolu è l’Institutu di Bologna.

Puru luntanu da a so isula nativa, e radiche olettese di Natale Saliceti anu sempre cuntatu in a vita di u medicu. D’aprile 1757, quandu u canonicu Giulio Matteo Natali, u so parente è amicu, hè vittima d’un tentativu d’assiniu, fù infatti ellu à intervene è cura e so ferite.

Cinque anni prima di more, in u 1784, publicheghja un studiu nant’à a propagazione di a tisia (tuberculosi pulmonare).

CARRUGHJELLU FAUSTINE LECCIA

(25/09/1880, Oletta - 13/05/1958,...)

Marie Augustine Leccia detta Faustine hè nata u 25 di sittembre di u 1880 in Oletta. Dopu una scularità studiosa, piglia u so Brivettu Elementare po Superiore, è naturalmente sceglie l’insignamentu è ottene u so Certificatu d’Attitudine Pedagogiche.

Institutrice po Direttrice di a Scola d’oletta, hè numinata Officiale d’Accademia in u 1920.

In i tempi di Guerra hè ella a secretaria di Merria.

Resistente di a prima ora, I taliani l’avianu chjamatu “La Passionaria » è signalata à prò di i gaullisti è di i britanichi. Arristata da l’occupanti, purtata à Marbeuf malgratu ch’ella fussi malata di u core, fù internata in un campu di cuncentrazione à i Prunelli di Fiumorbu. Senza a signatura di l’armistiziu, saria stata purtata in Italia.

Liberata dopu à a Vittoria, assai diminuita, piglia nemenu parte à l’amministrazione di a cumuna.

Fù attiva assai in Oletta, è numarosi sò quelli à arricurdassi d’esse venuti in casa soia à sunà u pianò è ancu à studià.

Pueta ricunnisciuta, fù spessu à l’onore in li cuncorsi di puesia (Académie de Jeux Floraux de Nice, Annales Politiques et Littéraires – à unu di issi cuncorsi, u presidente era Frederic Mistral).

Scrisse in onore di a Madonna di a Pietà una bellisima puesia chì hè fermata in l’annali di a cumuna « O Madre di Pietà ».