U lavu di Padula hè un lavu di matrale nant’à u fiume Furmicaiola, fiumicellu chì si lampa ind’è u Salinelle aghjunghjente à l’Alisu.

I dui principali corsi d’acqua chì l’alimentanu sò u fiumicellu di Vitte è u fiumicellu di Vomera. Hè situatu ind’è a piaghja d’Oletta ind’è u Nebbiu, a parte a più impurtente si trove nant’à a cumuna d’Oletta, è duie piccule parte meridiunale sò à Olmeta di Tuda.

Caratteristiche 

A ritinuta d’acqua di Padula hè stata messa in serviziu in u 1991. Hè una diga in tarra (87 000 m3), munita d’un sgurgatoghju è d’un canale, chì permette di ricuperà l’acque di parechji fiumicelli d’un bacinu versante di 450 ettari. A so capacità massimale hè di 1 900 000 m3.

Storia 

U lavu di Padula hè statu creatu per risponde à i bisogni crescente in acqua per l’agricultori di a Conca d’Oru. L’opera messa in serviziu in u 1991, alimenta una reta d’irrigazione ind’è a piaghja d’Oletta, San Fiurenzu è Patrimoniu è in acqua putabile per a cumuna di San Fiurenzu. Ma i bisogni in acqua potabile di u polu turisticu vicinu di San Fiurenzu sò impurtenti, L’Uffiziu di l’ecchipamentu idrolicu di Corsica (OEHC) divinutu cù a legge di u 13 di maghju di u 1991, un stabilimentu publicu industriale è cumerciale di a Culletività Territuriale di Corsica, hà fattu studii per realizà i travagli necessarii. In u 2005, l’OEHC pruprietariu, hà auturizatu cù un arristatu prefetturale, à splutà, à trattà è à distribuisce un vulumu in acqua di l’ordine di 2 millioni di m3 per suddisfà i bisogni di a regione di u Nebbiu durante l’estate.

Per ciò chì hè di u pianu d’acqua di prima categuria, l’arristatu prefetturale stipula chì :

 - A piscicultura è a pesca seranu auturizati ind’è un quadru di cunvenzioni passati cù a Federazione di a pesca ;
- L’accessu à a ritinuta sarà pedestra;
- A navigazione cù vela, à remi o à motore è i bagni sò interdetti. 

Bestiame 

Dipoi a creazione di u matrale di Padula, una flora è un bestiame spuntaneu liatu à u locu umidu anu pussutu sviluppassi.  Stu sviluppu hè statu di più rapidu  postu chì a ritinuta d’acqua hè pocu utilizata per u so rolu di riserva. E variazione di u nivellu di l’acqua sò pocu impurtente. Stu situ umidu favurevule à a nidazione è à a migrazione d’acelli di zone umide. Parechje grande categurie sò state riperturiate à nivellu di u bestiame:
- Pesci (carpe, truite ecc…)
- Anfibii ( rane, discoglosses ecc…)
- Rettili ( testughjine cistude/ di floride , sarpi à cullane ecc..)
- Acelli ( folaga, sperghjornu, capinere, ecc…)

Flora 

Stu locu hè caratterizatu da una flora chì prufita di u clima meditteraniu cù u sviluppu di spezie di a machja di Corsica ingiru à u lavu (arbitru, talavellu , ecc…) è di spezie di zone umide (Canne, Erba Spasa ecc…).